عبرت الفنانة مروة عبد المنعم عن حزنها واستيائها من ابتعادها عن المشاركة في الأعمال الفنية خلال الفترة الأخيرة، مؤكدة أنها لم تتلق أي عروض للمشاركة في أعمال جديدة.
وفي تصريحات تلفزيونية مؤثرة، قالت مروة عبد المنعم: “أنا بتكلم مع ربنا وبقوله يا رب يعني أنا نفسي أشتغل طيب أنت ليه حببتني في الفن ما أنت اللي اديتني الموهبة دي، طيب إنت مش عايزني أشتغل؟ أنا مش معترضة على حكمك، أنا بجتهد أبقى راضية بس أنت ساعدني لأني غصب عني نفسي أمثل”.
لم يتوقف حديث مروة عبد المنعم عند قلة الأعمال الفنية، بل كشفت أيضاً عن تفاصيل تعرضها لعملية نصب من قبل مهندس ديكور. وأوضحت قائلة: “كنت عايشة في شقة إيجار وكان لازم أمشي خلال شهرين علشان رفعوا الإيجار أوي، وكان عندي شقة على المحارة ومكنش معايا فلوس أخلصها، وكان في مهندس ديكور عاملي حاجات غلط جبت مهندس غيره وقولتله الغلط ده نشيله”.
وتابعت مروة عبد المنعم في سرد تفاصيل الواقعة: “مكنش معايا غير مبلغ صغير وقولتله كل ما تشتغل هديلك فلوس، هو اشتغل على الغلط والفلوس اللي خدها محاسبش الصنايعية ومعمليش حتى الأبواب، وقعدت في شقة من غير سقف ولا باب، وكنت بقولهم أنا عايزة أعيش، ولقيت في مبلغ كبير أوي عليا واضطريت آخد قرض علشان أسدد”.
وفي ختام حديثها، كشفت مروة عبد المنعم عن صعوبة وضعها الاجتماعي قائلة: “أنا معنديش راجل أسند عليه، واللي عندي هيخاف أقوله أنا عايزة فلوس، والناس خبطت عليا قالولي الحمام بينقط قولتلهم قسماً بالله ما هعمل حاجة، حسبي الله ونعم الوكيل، عشان شايفين أني لوحدي مفيش حد هيقدر عليهم”.
